მძღოლის მომსახურების ხელშეკრულება

1.1. დამოუკიდებელი კონტრაქტორი: მძღოლი წარმოადგენს დამოუკიდებელ კონტრაქტორს და არ არის შპს გეთიუ.ჯი-ს (ს/კ 402370876, შემდგომში „პლატფორმა“ ან „კომპანია“) დასაქმებული.

1.2. ანაზღაურება: მძღოლი იღებს ანაზღაურებას შესრულებული მგზავრობებიდან, პლატფორმის მიერ განსაზღვრული საკომისიოს გამოკლებით.

1.3. კონკურენციის შეზღუდვა: იკრძალება პლატფორმის გვერდის ავლით მგზავრთან დაკავშირება ან მომსახურების გაწევა.

2.1. ფლობის უფლება: მძღოლი უნდა იყოს მფლობელი ან ფლობდეს გენერალურ მინდობილობას.

2.2. გამოცდილება: სავალდებულოა მინიმუმ 2-წლიანი მართვის სტაჟი.

2.3. ნასამართლეობა: მძღოლი ადასტურებს, რომ არ აქვს ნასამართლეობა. პლატფორმა უფლებამოსილია ნებისმიერ დროს მოსთხოვოს მას ცნობის წარდგენა.

3.1. ალგორითმული შეზღუდვა: სისტემა მძღოლს არ შესთავაზებს შეკვეთას, თუ მგზავრობის დაწყებამდე დარჩენილი დრო 1 საათზე ნაკლებია. ჯავშანი იხსნება მხოლოდ იმ შემთხვევაში, თუ მძღოლს აქვს მინიმუმ 1 საათი ლოკაციამდე მისასვლელად.

3.2. მისვლის სტანდარტი: შეკვეთის დადასტურების შემდეგ, მძღოლს აქვს მაქსიმუმ 1 საათი მგზავრთან მისასვლელად.

3.3. ადრე გამოცხადება: მძღოლი ვალდებულია მითითებულ მისამართზე იმყოფებოდეს მგზავრობის დაწყებამდე 10 წუთით ადრე.

3.4. დადასტურება და გაუქმება: მძღოლი ვალდებულია დროულად დაადასტუროს შეკვეთა. თვეში 3-ზე მეტი გაუქმება ან სისტემატური დაგვიანება გახდება ანგარიშის ბლოკირების საფუძველი.

4.1. მგზავრის კომფორტი: მძღოლი ვალდებულია გაითვალისწინოს მგზავრის თხოვნები მართვის სტილსა და სისწრაფესთან დაკავშირებით. ვალდებულია გაუჩეროს მგზავრს გზად ან დაელოდოს (უკან დაბრუნების მოთხოვნისას).

4.2. კლიმატკონტროლი და აუდიო: მძღოლი ვალდებულია დააკმაყოფილოს მგზავრის ნებისმიერი მოთხოვნა სალონში ტემპერატურის რეგულირებაზე (კონდიციონერი/გათბობა) და მუსიკაზე (ან ხმის სრულად გათიშვაზე).

4.3. დრესკოდი: მძღოლი ვალდებულია გამოცხადდეს მოწესრიგებული სამოსით. კატეგორიულად იკრძალება მოკლე შორტებით, სპორტული შარვლით, ჩუსტებით ან მაისურის გარეშე მუშაობა.

4.4. მოწევის აკრძალვა: ავტომობილში მოწევა ან ელექტრონული სიგარეტის (ვეიპის) გამოყენება კატეგორიულად იკრძალება როგორც მძღოლის, ისე მგზავრის მიერ. მძღოლის მიერ ამ წესის დარღვევა გამოიწვევს 50 ლარიან ჯარიმას საგარანტიო დეპოზიტიდან.

4.5. აღჭურვილობა: სავალდებულოა უფასო სასმელი წყალი (დალუქული) და გამართული Wi-Fi. ავტომობილი უნდა იყოს სუფთა და ტექნიკურად გამართული.

4.6. ხელმისაწვდომობა: მძღოლი ვალდებულია იყოს ხელმისაწვდომი თვის განმავლობაში მინიმუმ 25 დღე, წინააღმდეგ შემთხვევაში ანგარიში დაიბლოკება.

4.7. კომუნიკაცია: მძღოლს ეკრძალება მგზავრთან პოლემიკაში შესვლა. ნებისმიერი პრობლემისას მძღოლი ვალდებულია მუდმივ კომუნიკაციაში იყოს პლატფორმის ოპერატორთან.

5.1. საგარანტიო დეპოზიტი (Guarantee Deposit): მუშაობის დაწყებამდე მძღოლი ვალდებულია შეიტანოს 100 ლარი საგარანტიო ანგარიშზე, რომელიც დაბლოკილია და გამოიყენება მხოლოდ წესების დარღვევისას სანქციების დასაფარად.

5.2. ოპერაციული ბალანსი (Operating Balance): მძღოლის მიმდინარე ანგარიში, საიდანაც ირიცხება პლატფორმის საკომისიოები. ბალანსის უარყოფითი ყოფნისას (< 0 GEL), მძღოლს ეზღუდება ნაღდი ანგარიშსწორებით (CASH / CASH 100%) ახალი შეკვეთების მიღება.

5.3. ფოტოების ხარისხი: თუ ატვირთული ფოტოები არ შეესაბამება ინსტრუქციას, გადაღება-დამუშავების საფასური (50 ლარი) ჩამოიჭრება ოპერაციული ბალანსიდან.

5.4. საწყისი ტარიფი: ახალი მძღოლებისთვის, კონკურენტუნარიანობის უზრუნველსაყოფად, პლატფორმაზე დადგენილია სავალდებულო ფიქსირებული საწყისი ტარიფი პირველ 10 შეკვეთაზე. ტარიფის დამოუკიდებლად შეცვლა შესაძლებელია მხოლოდ 10 შეკვეთის წარმატებით დასრულების შემდეგ.

5.5. დაბრუნება: თანამშრომლობის შეწყვეტისას, წესების სრული დაცვის შემთხვევაში, საგარანტიო დეპოზიტი (100₾) სრულად ბრუნდება.

6.1. ნულოვანი ტოლერანტობა (გვერდის ავლა და შეურაცხყოფა): მგზავრთან პირდაპირი გარიგება (პლატფორმის გვერდის ავლა), ან მგზავრის/წარმომადგენლის მიმართ სიტყვიერი/ფიზიკური შეურაცხყოფა ითვალისწინებს მყისიერ სამუდამო ბლოკირებას პლატფორმიდან და 100 ლარიანი საგარანტიო დეპოზიტის სრულად ჩამორთმევას (ფორსმაჟორული გაუქმება).

6.2. გამოუცხადებლობა: ჯავშნის 20% ჯარიმა + ჩანაცვლების ხარჯების ანაზღაურება.

6.3. ხარისხის დარღვევა: მგზავრისთვის გაწეული კომპენსაცია/ფასდაკლება ანაზღაურდება მძღოლის მიერ.